Or, WE'VE AYE BEEN PROVIDED FOR. Come, sit down, my crony, an' gi'e me your crack, Let the win' tak' the cares o' this life on its back, Our hearts to despondency we ne'er will submit, We've aye been provided for, an' sae will we yet    An' sae will we yet, an' sae will we yet, We've aye been provided for, an' sae will we yet. Let's ca' for a tankar' o' nappy brown ale, It will comfort our hearts, an' enliven our tale; We'll aye be the merrier the langer that we sit, We've drunk wi' ither mony a time, an' sae will we yet,    An' sae will we yet, etc. Sae rax me your mill, an' my nose I will prime, Let mirth an' sweet innocence employ a' our time; Nae quarr'lin' nor fightin' we here will permit, We've pairted aye in unity, an' sae will we yet,    An' sae will we yet. etc. Let the glass keep its course, an' gae merrily roun', The sun has tae rise tho' the moon s'ou'd gae doun. Till the house be rinnin' roun' aboot, 'tis time eneugh tae flit, When we fell we aye wan up again, an' sae will we yet;    An' sae will we yet, an' sae will we yet, When we fell we aye wan up again, an' sae will we yet
COME, SIT DOWN, MY CRONY
The Village of Chryston - North Lanarkshire - Scotland
Chryston
Walter Watson
The Chryston Poet