Air - " The Banks o' the Dee. "
The sweets o' the simmer invite us to wander
Amang the wild flowers, as they deck the green lea,
An' by the clear burnies that sweetly meander,
To charm us as hameward they rin tae the sea :
The nestlin's are fain the saft wing to be tryin',
As fondly the dam the adventure is eyein',
An' teachin' her notes, while wi' food she's supplyin'
Her tender young offspring, like Maggie an' me.
The corn in full ear is now promisin' plenty,
The red clusterin' row'ns bend the witch-scarrin' tree,
While lapt in its leaves lies the strawberry dainty,
As shy tae receive the embrace o' the bee.
Then Hope, come alang, an' oor steps will be pleasant,
The future, by thee is made almost the present,
Thou frien' o' the prince, an' thou frien' o' the peasant,
Thou lang has befriended my Maggie an' me.
Ere life was in bloom we had love in our glances,
And aft I had min' o' her bonny blue e'e;
We needet nae art to engage our young fancies,
'Twas done ere we kent, an' we own't it wi' glee.
Now pleas't, an' ay wishin' tae please ane anither,
We've pass't twenty years since we buckled thegither,
An' ten bonny bairns, lispin' faither an' mither.
Ha'e toddl't fu' fain atween Maggie an' me.
MAGGIE AN’ ME
The Village of Chryston - North Lanarkshire - Scotland