[Sung on the evening after the review of the Kilsyth Troop of Yeomanry at Stirling, in 1821.] Come join wi' me my comrades a' Assembled under martial law, Tae synd the cares o' life awa',    An' whistle o'er the lave o't. Wi' social hearts an' fu' o' glee, Let's fling aside ilk party plea, We'll tak' what fortune has tae gi'e,    An' whistle o'er the lave o't. When false alarm o'erspreads the land Tae loose our silken social band, On honour's side we'll bravely stand,    An' whistle o'er the lave o't. When War lifts up his han' o' steel, Wi' threats, tae wrang our kintra's weel, We'll meet her faes upon the fiel',    Tae whistle o'er the lave o't. Let statesmen deal in state affairs, We want their power, we want their cares, Our hearts may loup as light as theirs,    Tae whistle o'er the lave o't. Our wives an' sweethearts we'll caress, An' toast them wi' a flowin' gless, Their kin' return, let lovers guess,    We'll whistle o'er the lave o't. May peace an' plenty cheer our isle, May bustlin' Commerce blithely smile, An' Science foot the floor in style,    Tae whistle o'er the lave o't. God save our great King George the Fourth, An' speed his journey tae the north, May his opponents a' henceforth    Gae whistle o'er the lave o't.
WHISTLE O’RE THE LAVE O’T
The Village of Chryston - North Lanarkshire - Scotland
Chryston
Walter Watson
The Chryston Poet