Air - " Calder Fair." [Written, by desire, for a friend who wished a Bacchanalian song, with at least one verse to fit a bachelor.] When gloamin' gi'es the sons o' toil A needfu' weeock's leisure, Tae swap the uncos aff in style, An' catch a blink o' pleasure; We needna wonner tho' the chaps May form a social quorum, To set agaun the stoups an' caps At push aboot the jorum. We're steppin' thro' the muir o' life, Whaur ups an' douns are plenty: The wat'rin' bothies, too, are rife, An' braw an' easy ken't aye. Whae'er may chance tae venture in, An' licht on sweet decorum, 'Tis ten tae ane they'll fa' ahin' At push aboot the jorum. Some like to figure in the van In howtie expectation, That we wha toddle as we can May see wi' admiration. Tho' Jock may chance tae ha'e the mair That' John was born afore 'im, The clown may laugh as loud's the squire At push aboot the jorum. There's some in kin'ness tae their legs Torment their lugs in hurlies, While ithers skelp awa' in gigs, An' see a hunner ferlies. Ane buys a Father Matthew's pledge For sake o' variorum, An' syne he raxes o'er the hedge Tae push aboot the jorum. Some fash their heids wi' State affairs, An' some wi' non-intrusion ; There some wad raither gang in pairs Than ride amang a thousan'. Some lilt at " Roy's " canty wife, Some fling at " Tullochgorum," But naething waukens wit to life Like push about the jorum. I like a lassie unco weel As lang's she's blithe an' seemly, But yoket wi' a canny chiel A wife grows rather hamely ; She glooms at this, she orders that, An', hourly watchin' o'er 'im, He's pinch't tae get his girsle wat At push aboot the jorum. When sang an' sentiment gae roun', The moments pass sae cheery, That like eneugh the drappie's done Afore the cronies weary. Gin e'er ye meet the drowsy wicht Hand aff 'im, an' deplore 'im, Wha ne'er enjoy'd a merry nicht At push aboot the jorum.
PUSH ABOUT THE JORUM
The Village of Chryston - North Lanarkshire - Scotland
Chryston
Walter Watson
The Chryston Poet